Алкагольнае ап’яненне, купанне ў забароненых месцах, ігнараванне правіл паводзін на вадзе – вось асноўныя прычыны гібелі людзей на вадаёмах.

– Бяспеку купальшчыкаў на стыхійных пляжах ніхто гарантаваць не можа, – падкрэслівае начальнік Міёрскай выратавальнай станцыі Уладзімір Канаплёў і звяртае ўвагу: – Праз пяць – сем хвілін пасля таго, як чалавек пайшоў пад ваду, шанцаў на яго выратаванне практычна не застаецца.

Што нельга рабіць аматарам адпачынку на вадаёмах, абазначана ў пункце 24 Правіл аховы жыцця людзей на водах, зацверджаных Пастановай Саўміна № 543 ад 18 жніўня 2023 г.

ЗАБАРАНЯЕЦЦА:

• купацца ў забароненых для гэтага месцах, а таксама ў цёмны час сутак;
• ужываць на пляжах алкагольныя, слабаалкагольныя напоі, піва, наркатычныя сродкі, псіхатропныя рэчывы, іх аналагі, таксічныя або іншыя адурманьвальныя рэчывы;
• купацца ў стане алкагольнага ап’янення або выкліканага ўжываннем наркатычных сродкаў, псіхатропных рэчываў, іх аналагаў, таксічных або іншых адурманьвальных рэчываў;
• заплываць за граніцы, якімі абазначана акваторыя пляжа;
• падплываць да суднаў, плывучых аб’ектаў;
• узбірацца на тэхнічныя і папераджальныя знакі, буі, іншыя прадметы;
• плаваць на спартыўным інвентары, дошках, лежаках, бярвёнах, аўтакамерах, надзіманых матрасах, іншых прадметах;
• выкарыстоўваць выратавальныя сродкі і рыштунак не па прызначэнні;
• арганізоўваць гульні ў вадзе, звязаныя з ныраннем і захопам адпачывальнікаў, а таксама ўчыняць іншыя дзеянні, якія могуць стаць прычынай няшчаснага выпадку;
• падаваць ілжывыя сігналы трывогі;
• пакідаць дзяцей да 14 гадоў без нагляду;
• мыць бялізну, транспартныя сродкі, купаць жывёлу.

– Таксама забаронена скакаць у ваду з суднаў, плывучых аб’ектаў, мастоў, прычалаў, плацін, дамб, іншых гідратэхнічных збудаванняў і прыстасаванняў, – дапаўняе начальнік выратавальнай станцыі. – Каб адпачынак на вадзе пакінуў выключна прыемныя ўражанні, выконвайце правілы бяспечных паводзін.