РАУС разам з РАНС і ТВВОД перайшлі на ўзмоцнены рэжым патрулявання месцаў масавага адпачынку ля вады. Галоўная задача рэйдавых груп – забеспячэнне правапарадку, папярэджанне гібелі людзей на вадаёмах і спыненне адміністрацыйных правапарушэнняў. Пра гэта расказаў участковы інспектар міліцыі аддзела аховы правапарадку і прафілактыкі РАУС Васіль Быкаў:

 – Зоны адпачынку і пляжы – грамадскія месцы, за парушэнне ўстаноўленых правіл у якіх прадугледжана адміністрацыйная адказнасць. Распіццё алкаголю і піва караецца штрафам да васьмі базавых велічынь па арт. 19.3 КаАП. Паўторнае парушэнне на працягу года або з’яўленне там у стане моцнага ап’янення пагражае штрафам да 15 базавых або адміністрацыйным арыштам. Купанне ў забароненых месцах (у зоне дзеяння знакаў «Купанне забаронена!») мае наступствы ў выглядзе штрафу ад адной да трох базавых па арт. 24.42 КаАП. Да іх адносяць таксама меліярацыйныя каналы, кар’еры, сажалкі-капані і тэхналагічныя вадаёмы. Дробнае хуліганства, да якога адносяць нецэнзурную лаянку, абразлівае прыставанне да людзей і іншыя дзеянні, што парушаюць спакой, караецца штрафам ад дзвюх да 30 базавых велічынь, грамадскімі работамі ці арыштам (арт. 19.1 КаАП).

За развядзенне адкрытага агню па-за абсталяваных пляцовак пагражае штраф да 12 базавых па арт. 16.41 КаАП. За парушэнне правіл паркоўкі – стаянку транспартных сродкаў на газонах, а таксама бліжэй за 30 метраў ад берагавой лініі ля водных аб’ектаў – да пяці базавых.

Пад асаблівай увагай дзіцячая бяспека, бо асноўная прычына трагедый з удзелам непаўналетніх – у адсутнасці кантролю. Калі праваахоўнікі выявілі ля вады малых без суправаджэння дарослых, то бацькоў могуць прыцягнуць да адказнасці за невыкананне абавязкаў па іх выхаванні, згодна з арт. 10.3 КаАП. Штраф – 10 базавых велічынь.

Каб адпачынак прайшоў без наступстваў, прытрымлівайцеся наступных правіл:

v адпачывайце толькі на афіцыйных пляжах, дзе дзяжу- раць выратавальныя пасты ТВВОД, дно вадаёма ачышчана ад смецця, а зоны заплыву абазначаны буямі;

v не заплывайце за абмежавальныя знакі і не набліжайцеся да суднаў, лодак, катарамаранаў і гідрацыклаў, якія рухаюцца;

v не ўваходзьце ў ваду адразу пасля доўгага знаходжання на сонцы ці інтэнсіўных фізічных нагрузак, бо рэзкі перапад тэмператур можа выклікаць сутаргі ці спазм сасудаў;

v уважліва сачыце за сваімі асабістымі рэчамі.

Калі сталі сведкам правапарушэння, заўважылі чалавека, які тоне, або самі маеце патрэбу ў экстраннай дапамозе міліцыі, – тэрмінова звяртайцеся да бліжэйшага нарада ці тэлефануйце на нумар 102.

Падрыхтавала Алена ВАРОНІНА.