Яшчэ ў пачатку снежня ўлады Кітая інфармавалі Сусветную арганізацыю аховы здароўя пра ўспышку невядомай пнеўманіі ў горадзе Ухань. У студзені кітайскія медыкі выявілі ўзбуджальніка хваробы – каронавірус 2019-nCoV. Яго інкубацыйны перыяд складае каля двух тыдняў.

Мяркуецца, што крыніцай заражэння стаў рыбны рынак ва Ухані, дзе гандлявалі таксама некаторымі відамі жывёл і рэптылій. Менавіта пасля яго наведвання ў тых, хто падхапіў інфекцыю, з’явіліся аднолькавыя сімптомы: павышэнне тэмпературы і кашаль.
На раніцу 10 лютага захварэлых новым тыпам каронавіруса ў Кітаі было 40 554 чалавекі. Памерла 910, вылечылася 3 309. Інфекцыя распаўсюдзілася ў 28 краін і ахапіла там яшчэ звыш 330 чалавек.

Да Беларусі небяспечны каронавірус яшчэ не дабраўся. Эвакуіраваных з Кітая грамадзян праверылі медыкі. У Нацыянальным аэрапорце Мінск арганізаваны санітарна-каранцінны кантроль пасажыраў з краін, дзе выяўлена захворванне.

Турыстам, што выязджаюць у Кітайскую Народную Рэспубліку, рэкамендуецца пазбягаць:

кантактаў з жывёлай і птушкай;
наведвання рынкаў морапрадуктаў, жывой птушкі, ферм;

ужывання сырых і недастаткова тэрмічна апрацаваных прадуктаў жывёльнага паходжання (малака, яек, мяса, птушкі, морапрадуктаў);
блізкага кантакту з людзьмі з прыкметамі вострых рэспіраторных захворванняў.

Для прафілактыкі пнеўманіі і іншых рэспіраторных інфекцый неабходна:
мыць рукі з вадкім мылам і вадой, выкарыстоўваць антысептычныя сродкі на спіртавой аснове;
праводзіць гігіену рук, асабліва перад дотыкам да рота, носа ці вачэй, пасля кашлю і чхання, кантакту з аб’ектамі навакольнага асяроддзя (парэнчамі, дзвярнымі ручкамі);
пры чханні прыкрываць рот і нос папяровай сурвэткай.

ФАКТЫ
Назва віруса мае дачыненне да кароны. Праўда, не манархавай, а сонечнай. На абалонцы мікробаў, якія выклікаюць гэтую хваробу, ёсць спецыфічныя варсінкі. Іх форма паўтарае контур сонечнай кароны пры зацьменні.

Да 60-х гадоў мінулага стагоддзя каронавірусы лічыліся выключна хваробамі братоў нашых меншых, яны паражалі дыхальныя органы птушак, сабак, катоў, буйной рагатай жывёлы, свіней (птушыны і свіны грыпы). Пазней высветлілася, што некаторыя каронавірусы могуць трапляць і ў чалавечы арганізм.

Дзве іншыя вядомыя эпідэміі каронавірусаў – гэта SARS-nCoV (атыповая пнеўманія, 2002 – 2003 год) і MERS-nCoV (блізкаўсходні рэспіраторны сіндром, 2015).

Калісьці Ванга прадказала, што ў 2020 годзе планету атакуе невылечны вірус. Адзначыла, што ён будзе «даўно забытым» і ў той жа час «новым». Структура бактэрый каронавіруса 2019-nCov на 80% супадае са складам віруса SARS, які ў 2003 годзе выклікаў атыповую пнеўманію. І ў той жа час яго можна лічыць новым штамам.

Фота для ілюстрацыі.
Анжэліка СУХОЎСКАЯ, намеснік галоўнага ўрача
па медыцынскай экспертызе і рэабілітацыі.