У залатарніка канадскага няма ворагаў сярод раслін і насякомых. Між тым сам ён уяўляе сур’ёзную небяспеку для навакольнага асяроддзя. Пра шкодны ўплыў расліны на флору і фаўну і эфектыўныя метады яе ліквідацыі нагадвае галоўны спецыяліст раённай інспекцыі прыродных рэсурсаў і аховы навакольнага асяроддзя Аляксандр Ваяводаў.

– Залатарнік канадскі з’яўляецца адной з найбольш небяспечных інвазіўных раслін, – падкрэслівае Аляксандр Яўгенавіч. – У свой час быў завезены з мэтай дэкаратыўнага азелянення, а таксама для вырошчвання на корм жывёле.

Чаму гэтая расліна стала «персонай нон грата» ў прыродных экасістэмах.

– Небяспека распаўсюджвання залатарніка канадскага ў тым, што ён цалкам змяняе навакольную флору і фаўну. Кожны куст дае да ста тысяч насення з вельмі высокай усходжасцю. Яно хутка разносіцца ветрам, з’яўляюцца новыя ачагі вырастання. Карэнішчы выдзяляюць у глебу рэчывы, якія прыгнятаюць рост іншых раслін, што прыводзіць да іх поўнага выцяснення з прыродных экасістэм. У лугавых і пойменных экасістэмах залатарнік змяняе састаў і структуру сенакосных угоддзяў, значна пагаршаецца якасць нарыхтоўваемых кармоў. У пойменных лугавых згуртаваннях нясе пагрозу папуляцыі рэдкіх і знікаючых відаў раслін. На сельскагаспадарчых угоддзях парушае структуру пасеву, зніжаючы ўраджайнасць сельгаскультур. Услед за гэтым знікае большасць лугавых насякомых, птушак, дробных млекакормячых. Такім чынам, займаючы любы ўчастак, залатарнік канадскі цалкам змяняе яго раслінны і жывёльны свет.

Наколькі актуальная праблема для Віцебскай вобласці і ў прыватнасці Міёрскага раёна.

– Згодна з дадзенымі інвентарызацыі мінулага года, плошча вырастання залатарніка канадскага на Віцебшчыне складае 288,85 гектара. Найбольш інвазіраваны Аршанскі і Віцебскі раёны. У Міёрскім плошчы нязначныя, аднак ёсць тэндэнцыя да іх павелічэння.

Найбольш эфектыўныя спосабы пазбавіцца ад інвазіўнай расліны.

– Скошваць залатарнік канадскі неабходна да красавання і саспявання насення па меры адрастання расліны да 15-20 см. Больш эфектыўныя метады – хімічная апрацоўка, выкопванне або ўзворванне.

Акрамя навакольнага асяроддзя, залатарнік канадскі ўяўляе пагрозу для гаспадароў, на чыіх участках расце, паколькі гэта цягне адміністрацыйную адказнасць.

– Згодна з законам «Аб раслінным свеце», карыстальнікі зямельных участкаў абавязаны прымаць меры па барацьбе з інвазіўнымі раслінамі. З 19 чэрвеня за невыкананне патрабавання прадугледжаны штраф да дзесяці базавых велічынь.

Падрыхтавала Кацярына РЫНКЕВІЧ.