З візітам да вязня фашызму Яўгеніі Ігнацьеўны ОКУНЬ у вёску Ліпанты, што ў Туркоўскім сельсавеце, завітала супрацоўніца тэрытарыяльнага цэнтра Таццяна ШУЛЬГА. Прывезла 98-гадовай сяльчанцы патрэбную ў быце рэч – зручнае туалетнае крэсла. Гэта адзін з момантаў падтрымкі, якую былыя вязні атрымліваюць у рамках праекта «Індывідуальная дапамога і догляд». Рэалізуе дабрачынную справу міжнароднае грамадскае аб’яднанне «Узаемаразуменне» сумесна з германскім федэральным фондам «Памяць, адказнасць і будучыня».

Нечаканых гасцей Яўгенія Ігнацьеўна і сацыяльны работнік Васіліса Дуброўская сустрэлі цёпла і радасна. Пажылая жанчына часта гасцюе ў Васілісы Васільеўны.

 
– Шмат гадоў даглядаю Яўгенію Ігнацьеўну. Яна мне роднай стала, – заўважае сацработнік. – Ёсць такая паслуга – гасцявая сям’я, калі можна браць да сябе падапечных. Вось і запрашаем яе ў наш дом. Калі засумуе, вязём у родную хату, што па-суседстве ў Пякоціне.
У свае 98 гадоў Яўгенія Ігнацьеўна сама ходзіць, захавала цеплыню ў вачах, святло ў позірку і добрую памяць, у якой назаўсёды засталіся жахі вайны.

 
– Ой, колькі страху нацярпелася, – расказвае яна. – Сусед мяне агаварыў, што з партызанамі звязана. Немцы босай і ў адной сукенцы тры кіламетры гналі. Раніцай бацькі адзенне прынеслі. У Германіі толькі раз на дзень ела. Памятаю, як мы зямлю капалі, а над намі кулі свісцелі.

 
Большую частку свайго мірнага жыцця Яўгенія Окунь пражыла ў Туркоўскім сельсавеце, куды пераехала з Акунёва. Сваю сям’ю не стварыла. Жыла з маці, затым з роднай сястрой, дапамагала гадаваць пляменнікаў. Атулена ўвагай у глыбокай старасці.

 
У мінулым годзе ў рамках праекта «Індывідуальная дапамога і догляд» Яўгенія Ігнацьеўна атрымала кій, які аблягчае хадзьбу. Цяпер бытавы рэквізіт папоўніўся. 

Праект «Індывідуальная дапамога і догляд» рэалізуецца ў Беларусі з 1 сакавіка 2019 года. У цэнтры ўвагі – пацярпелыя ад нацысцкіх праследаванняў падчас Другой сусветнай вайны.

 
На пачатак рэалізацыі праекта ў нашым раёне пражывала 14 вязняў фашызму, цяпер іх 12. Супрацоўнікі аддзялення дзённага знаходжання для грамадзян пажылога ўзросту і суправаджальнага пражывання ТЦСАН вывучаюць іх патрэбы. У мінулым годзе восем чалавек атрымалі неабходныя ім тэхнічныя сродкі рэабілітацыі і прадметы гігіены на агульную суму 2 тысячы 274 рублі. Сёлета ажыццяўляецца матэрыяльная падтрымка па кампенсацыі затрат на набыццё паліва, лекаў, тэрміновы рамонт. Яе атрымалі чацвёра падапечных на суму ў 520 рублёў.

Кацярына РЫНКЕВІЧ

Фота Казіміра БЛАЖЭВІЧА.