Неяк падчас тыдня беларускай мовы і літаратуры настаўніца Ніна ВАРОНЬКА дала вучням заданне намаляваць любімае беларускае слова. Многія выбралі блакітныя валошкі. Тады педагог задумалася, якое слова з роднай мовы найбольш блізкае ёй. Адказ прыйшоў хутка – «натхненне».

Натхненне ў выглядзе сонца

– А як бы Вы адлюстравалі натхненне? – цікаўлюся ў Ніны Альдэфонсаўны.

На некалькі імгненняў суразмоўніца задумваецца. Пасля з усмешкай гаворыць:

– Вельмі люблю жоўты колер. Напэўна, намалявала б сонца. Натхняюць мяне яркія фарбы восені, шчырыя ўсмешкі людзей, любімая сям’я, родная вёска Дэмскія, падарожжы і, канешне, школьныя ўрокі.

Беларускай мове і літаратуры Ніна Варонька вучыць дзяцей 28 гадоў. Выкладае таксама і рускую філалогію. У самой у школьную пару любімым прадметам была матэматыка, асабліва падабалася рашаць задачы па геаметрыі.

– Прыходзіла пасля ўрокаў дадому, чарціла на лістах трохвугольнікі і даказвала тэарэмы, – прыгадвае яна. – З будучай прафесіяй вызначылася ў выпускным дзясятым класе, калі паступіла на завочныя падрыхтоўчыя курсы ў Мінскі педінстытут. Вучыцца на настаўніка матэматыкі не вырашылася, паколькі ў ліку ўступных экзаменаў была фізіка, якая мне давалася складаней. Выбрала беларускую філалогію.

 Візуалізацыя з гексамі і скрайбінгам

Пасля вучобы малады спецыяліст з дыпломам настаўніцы беларускай мовы і літаратуры вярнулася на Міёршчыну. Іншыя варыянты не разглядала. Маршруты вялі па раёне ў розных накірунках. Папшулі, Паташня, СШ № 3, СШ № 1, Туркова, Слабада, Мілашова, Чапукі.

– У некаторых школах працавала год – два, замяняла філолагаў, што знаходзіліся ў водпуску па доглядзе дзіцяці. У Мілашоўскай, дзе была намеснікам дырэктара па вучэбна-выхаваўчай рабоце, затрымалася на 14 гадоў, да закрыцця ўстановы. З 2017-га працую ў Чапуках, – знаёміць з настаўніцкай біяграфіяй. – Мне цікава развівацца ў прафесіі, спрабаваць новыя методыкі і формы ўрокаў. Падабаецца прымяняць візуалізацыю. Часта выкарыстоўваю гексы – шасцівугольнікі з інфармацыяй, якія трэба тэматычна спалучыць. Спрабую скрайбінг, калі тлумачэнне суправаджаецца простымі малюнкамі. На ўроках літаратуры ў старэйшых класах прымяняю методыку праблемных пытанняў.

Поўную версію чытайце ў нумары раённай газеты.

Кацярына РЫНКЕВІЧ.
Фота Казіміра БЛАЖЭВІЧА.