Алмазную мазаіку Наталля Тумарава адкрыла для сябе каля чатырох гадоў таму. Кожны яе дзень выкладзены рознакаляровымі стразамі, а колькасць сабраных карцін перавышае сотню.

Выстава абнаўляецца

На ўваходзе у Чапукоўскую сельскую бібліятэку вабіць позірк выстава вырабаў дэкаратыўна-прыкладной творчасці. Большасць з іх – карціны з алмазнай мазаікі. Яшчэ тут вырабы з бісеру, джутавай ніткі, 3D-паштоўкі.

– Стварэнне аб’ёмных 3D-карцін з паперы называецца папертоль. Нядаўна адшукала такі від творчасці ў інтэрнэце, вырашыла паспрабаваць, – заўважае гаспадыня ўстановы. – Выстава дзейнічае пастаянна, работы час ад часу абнаўляю. Наведвальнікі адразу заўважаюць навінкі, нават мужчыны.

Бібліятэкарам Наталля Тумарава працуе пяць з паловай гадоў. На новым месцы былы працаўнік сельскагаспадарчай сферы раскрыла ў сабе здольнасці, пра якія не здагадвалася, і знайшла захапленні, што сталі часткай паўсядзённасці.

– У абавязкі бібліятэкара ўваходзіла гуртковая работа. Пачынала з бісерапляцення. Вучыла дзяцей і сама вучылася. Да гэтага ніколі не займалася рукадзеллем, – расказвае суразмоўніца. – Цяпер гурткі пры бібліятэцы не дзейнічаюць, патрабаванні змяніліся. Аднак дзеці ўсё роўна прыходзяць, прыдумваю для іх цікавыя творчыя заняткі.

Адпачынак, зарад, тэрапія

Першая карціна Наталлі Іванаўны з алмазнай мазаікі – вобраз Мікалая Цудатворцы. Такі падарунак атрымала ад старэйшай дачкі. Заўважае, вельмі сумнявалася, што атрымаецца сабраць. Гэтую работу падарыла брату Мікалаю.

– Складаць вобразы святых і біблейскія сюжэты асабліва падабаецца. Такія работы для мяне самыя дарагія, – гаворыць майстрыца. – Пейзажы таксама люблю. Ды і ўвогуле любы сюжэт захапляе.

За творчым заняткам Наталля Іванаўна праводзіць кожны вечар. З яе слоў, гэта і адпачынак, і зарад, і тэрапія. Калі тры з паловай гады таму не стала мужа, менавіта за алмазнай мазаікай знаходзіла суцяшэнне.

Сабраць карціну са стразаў можа кожны, упэўнена майстрыца. Заўважае, работа памерам 40х50 у яе гатова за 12 вечароў, для большых патрэбна паўтара месяца. Заразіла сваім хобі некалькіх аднасяльчанак. У самой ужо 112 карцін. Некаторыя падарыла блізкім і сябрам, частку прынесла ў бібліятэку, большасць – дома на сценах. Асобныя ўпрыгожваюць падворак Новапагосцкага сельсавета на экасвяце «Жураўлі і журавіны Міёрскага краю».

Падарунак для майстрыцы

Алмазная мазаіка – захапленне № 1. Вабіць нават больш, чым кветкаводства. На падворку Наталлі Тумаравай 18 кустоў руж і мноства іншых красак.

Спрабуе іншыя віды рукадзельнай творчасці. Больш за год вышывала карціну крыжыкам. Практыкуецца ў дыванковай вышыўцы. Гэта стварэнне вырабаў – дыванкоў, пано – з нітак, якія, згодна са схемай, прапіхваюцца праз шчыльную аснову з тканіны, і такім чынам атрымліваецца аб’ёмны малюнак.

– Люблю спрабаваць новае, вельмі цікава. А калісьці і падумаць не магла, што з такім захапленнем буду займацца рукадзеллем, – з усмешкай заўважае суразмоўніца. –
Адзінае, што не вельмі зацікавіла, – карціны па нумарах. Для мяне гэта вельмі хутка.

Найлепшы падарунак для Наталлі Іванаўны – чарговы набор алмазнай мазаікі. Працягвае атрымліваць іх ад родных і сяброў. І кожны раз з асалодай прымаецца за чарговую гісторыю, складзеную з соцень каляровых стразаў.