У лютаўскім паветры адчуваюцца ледзь улоўныя подыхі блізкай вясны. На гэтую пару ў Язненскай сярэдняй школе планаў шмат. Вучні 10 агракласа пачалі сеяць насенне на расаду. Наперадзе клопаты на школьным агародзе. На беражлівыя адносіны да прыроды і навядзенне парадку на зямлі змесціцца акцэнт у выхаваўчай рабоце. Пакуль жа ў цэнтры ўвагі бяспека жыццядзейнасці, патрыятычнае выхаванне, прафарыентацыя.

Бяспека ў тварчасці

На мінулым тыдні адбыўся раённы этап рэспубліканскага конкурсу «Школа бяспекі». Язна прадставілі чацвёртакласнік Ягор Кубліцкі і пяцікласніца Вікторыя Радчына. Падрыхтавалі вуснае выказванне, паўтарылі правілы бяспечных паводзін, каб справіцца з тэставым заданнем.

Чакаюць вынікаў раённага этапа конкурсу «Выратавальнікі вачыма дзяцей» шасцікласнік Вадзім Корсак і вучаніца чацвёртага класа Валерыя Ліпская. Вадзім напісаў верш, у Леры – малюнак.

– Правілам бяспечных паводзін у быце, на дарозе, на вадаёмах і так далей вучым дзяцей пастаянна, – заўважае намеснік дырэктара па выхаваўчай рабоце Ірына Кухцінская. – Класныя кіраўнікі перыядычна размаўляюць з бацькамі, нагадваюць трымаць дзяцей у полі зроку і не пакідаць малых без нагляду.

Пад знакам патрыятызму

З 23 студзеня па 23 лютага ва ўстановах адукацыі раёна праходзіць месячнік грамадзянска-патрыятычнага выхавання. Язненцы таксама актыўнічаюць.

Годна прадставіла школу на раённым этапе конкурсу «Я – патрыёт сваёй краіны» дзесяцікласніца Анастасія Хахолка. Падчас выступлення адзначала, што любіць родны край трэба так, як сваю сям’ю.

– Часцей удзельнічаю ў конкурсах дэкаратыўна-прыкладной творчасці, аднак і на сцэне адчуваю сябе свабодна, – заўважае школьніца. – Стараюся добра вучыцца. Любімыя прадметы – беларуская, руская, замежная мовы, матэматыка, фізкультура. Сярэдні бал – 8. Люблю чытаць, спрабую пісаць вершы, захапляюся псіхалогіяй, з чым планую звязаць будучую прафесію.

Любімы занятак многіх вучняў-пачаткоўцаў – маляваць. За ім бавяць не толькі вольны час. Так, чацвёртакласніцы Валерыя Ліпская і Дзіяна Пазік падрыхтавалі малюнкі на конкурсы «Армія маёй краіны», «Прывітанне салдату», «Нам мір завяшчана берагчы».

У рамках месячніка адбыўся збор піянерскай дружыны, прысвечаны Дню памяці юнага героя-антыфашыста. Напярэдадні Дня памяці-воінаў інтэрнацыяналістаў школьнікі наведалі магілы Сяргея Шляпава ў вёсцы Іст і Уладзіміра Мяцеліцы ў Чарапах. Старшакласнікі прынялі ўдзел ва ўрачыстым мітынгу ў Міёрах.

Цяпер школа рыхтуецца да мерапрыемстваў з нагоды Дня абаронцаў Айчыны. У іх ліку – абласная грамадзянска-патрыятычная акцыя «Марафон Памяці».

Поўную версію чытайце ў нумары 13 раённай газеты.
Кацярына РЫНКЕВІЧ.
Фота Казіміра БЛАЖЭВІЧА.