Хвіліны Навагодняй радасці

Дзед Мароз са Снягуркай завіталі напярэдадні Новага года ў дзіцячае аддзяленне ЦРБ. Невялікая казачная праграма парадавала хлопчыкаў і дзяўчынак, якія па волі лёсу знаходзіліся на той момант у бальніцы. Магчыма, аптымістычны настрой, падараваны казачнымі і так чаканымі персанажамі, садзейнічаў іх хутчэйшаму выздараўленню.

Забаўляльная праграма была насычана конкурсамі, у якіх удзельнічалі не толькі дзеці, а і іх бацькі, урачы і медперсанал. Хуценька збіралі сняжкі з завязанымі вачыма, складвалі навагоднія паштоўкі-мазаікі, шукалі “свой” падарунак, каталі снежны ком, а на кім ён спыняўся, той расказваў казку, верш, спяваў песню ці загадваў загадку, вадзілі карагоды. Дзіцячы смех і радасць панавалі ў час сустрэчы.

Дзеці са шчаслівай усмешкай дзякавалі за падарункі Дзеду Марозу і яго ўнучцы, ролі якіх выконвалі спецыялісты ТЦСАН Марына Васільеўна Кайнарава і Ала Генадзьеўна Федарэц.

Вольга ВІШНЕЎСКАЯ.